Hebrews 10

Sâcmutâc dâŋte sâcko taha gie bakicne i jabane

1Sâcmutâc dâŋko wiac mukicne i mâc šâhec fârine fuaocmu irec mumucne sawa fuakac, fârine jâmbâŋ mâcne. Irec taha bapa jaŋe sâcmutâc dâŋ reŋkehuc jarane jarane taha barâ ba epie ŋic ira Anutu mai ecneeŋgopieŋ jaŋe sâcne maŋfuru mi bacjopaekac. 2Iŋuc eme muzac, taha bâzi ririke omaezac i¡ Ira Anutu mai ecneeŋgopieŋ jaŋe kiŋfâsâc enšapiŋ muzac, kiŋjeŋicte manabâc mocwâc mi enšapiŋ. 3Taha bâzi izi ine jarane jarane fuame kiŋjeŋicte manasueŋgopieŋ. 4Noniŋ bulimakao soczi wemocko kiŋjeŋic bâtâmirezac? I aricne. 5Irec hâcne Kristo mâreŋko wahaocte dâŋ šiŋuc muwec:

“Taha bâzi fuŋne fuŋnere mi egareekac,
sahac ine bâfua-narekomec.
6Qowi hâcbuc ririke me sâqocnere taha bapa
i fua-gareocte mi muekic.
7Eme mupo, `Manakic, no Anutu gore mic reŋkepere fisikopac',
miti papiao nore dâŋ qâreŋkekicne irec sâcko.”
8Faic dâŋ šiŋuc muwec fokac, “Taha bâzi fuŋne fuŋne â qowi hâcbuc sâqocnere taha irec mi egareekac â irec takicguekac” wiac i sâcmutâc dâŋte sâcko râe rikec ekicne. 9Erâ dâŋ šiŋuc šuhuckerâ muwec: “Manakic, gore dâŋ reŋkepere fisikopac”, iŋuc muhuc wiac raŋɋane bârârierâ ɋâricne moc âkendâŋnewec. 10Irec Anuture micdâŋte erâ Jesu Kristo e sahac-ticnezi taha bame maŋfuru embeŋ, i arec mocjaha ekicnezi fofo sanaŋ.

Jesu e nâŋâcnere taha fârine bawec

11Taha bapa sasawa jaŋe šoaŋne šoaŋne gie-jeŋic bahuc bâzi ijaha hati rikerâ rike ehuc jueŋgopieŋ, eme izi kiŋ bahac sâcne moc mi bâtâmireekac. 12Kristozi ine sâqocne-nâŋecte taha mocjaha bame tarame faic Anutu mefârenao fewec jukac. 13Eme ira râsifâc-ticne dockerâ waha fohuc kike-ticnere ââtesiŋ eniŋte woŋec juekac. 14Maŋfuru eere hatao juŋgopieŋ jaŋere taha mocjaha bahuc bâbâpiaŋ-jeŋicte gie batarawec. 15Eme Tiri Mârozi irec dâŋ mufua-nârekac wâc. Qanaŋ dâŋ šiŋuc fokac, Wofuŋ e kecšiŋuc mukac:

16“Ʒâhec dameŋko jaŋehec šâšâfic epemu ine kecšiŋuc:
No mumupaŋ dâŋnane maŋjeŋicko râepe huocmu,
erâ buhândâŋ-jeŋicko qâreŋkepe foocmu.”
17Erâ šuhuckekac,

“No kiŋjeŋic behe-jarepemu
â sindaŋ-jeŋicte mocwâc mi manasupemu.”
18Sâqocne tâmire-fâreme ine irec taha bapa iŋuc jaha omaeocmu.

Anutu siocmâc mai ecnezo

19Âgofâc, Jesu e socticnezi motâc ronârewecte furu ufuŋko fenaŋte maŋnâŋe. afeckekac. 20Irec hatane ɋâricne â jujune ine e jahac bâšâwe-nârewec. Ehuc ââketâc fowec, sahac-ticne hâcne, i fotâcnerâ fewec. 21Eme taha bapa fekicne Anuture ufuŋ qizeckerâ junârekac. 22Irec nâŋâc mamanasiŋzi maŋnâŋec baafeckeha siocmâc mai ecnehuc junšepeneŋ. Ine qanaŋ maŋnâŋec kiŋzi hegâpârekicne i socticnezi ruacneme taniŋkeha â sahac-nâŋec opâ ɋaɋaczi šureha iŋuc sâcne enaŋmu. 23Erâ mume sasanaŋzi wiac biŋe qanârewecte biŋedâŋ i kiki papaŋ jaha bajuhuc muhaŋnenšepeneŋ. 24Erâ wâc sosoŋaŋ ehuc maŋjauŋte â eehâmo giere qaqafeŋ enšepeneŋ. 25Ehuc mitire tutumaŋko gâcnezi mi fisihuc qâoma eeŋgopieŋ iŋuc mi ezo. Dameŋ sâko bâqiŋ-nâpokac, iŋuc hâcne manahuc šoɋac erâ faŋ qaqac enšepeneŋ.

Sâqocne mana afeckehuc bapa irec dâŋ

26Nâŋâc dâŋ fâri qizecnezi maŋnâŋec âke tamaehame sâqocne mana jaŋgeŋkehuc bapene mozi irec taha bame tâmireocmu? Aricne, iŋuc mi fokac, 27ine okacne hâhâwicne â šocbâruŋ sâko izi sawa woŋec-nâŋec foocmu. Ʒocbâruŋ izi mitire râsifâc šâmiziec-jopaocmu hâcne. 28Ŋic moczi Mosere sâcmutâc dâŋ mana suahuc qame ŋic jajahec me jahec â moczi mujaŋgeŋkepie acmâc jaha qapie hâmoekac. 29Eme ŋic moc e Anuture Ŋokâ ro waha âte ecnehuc, šâšâficte soc ruarâ maŋfuru ewec i mana suahuc aki anonoc rune Mâro musoriŋkeocmu, e okacne mo iŋucne fisicneocmu muŋgopieŋ? 30Nâŋâc dâŋ kecšiŋuc muwec ere fuŋne manaeŋgopeneŋ: “Kiŋ babatara i nore gie, okacne babazu i noni epemu.” Erâ moc šiŋuc fokac: “Wofuŋ e ŋicfâc-ticne jaŋere dâŋ mutara-jareocmu.” 31Anutu jujune ere meo fefe i wiac hâhâwicne jâmbâŋ.

Miti ba behec mi ezo

32Ŋoŋe mârâc wiac ejumbieŋ irec manasunšepieŋ. Dameŋ ira maŋŋeŋiczi hae furehame fific guguriŋ maŋko juju gie sâko bahuc sanaŋkembiŋ. 33Eme gâcne ŋoŋe imaŋ gomaŋ â šâic busâqoc fai-ŋeŋicko feme ŋic jaŋere maio mamakâc embiŋ, â gâcne ŋoŋe ine âgofâc-ŋeŋic wiac iŋucne ejarepie šâic-jeŋic mâmâc manambiŋ. 34Ŋoŋe âgofâc-ŋeŋic kâpâcwâru ficko fepie jaŋere erâ buheric fua-ŋarewec, â moneŋ mafa ŋowac ropie ine mafa fârine fofone fonârekac muhuc manapie bubiaŋnehec ewec. 35Eme ši hâbi-ŋeŋic mi goroŋkezejec, hâbihec juku furine kâcɋene rozo. 36Irec ŋoŋe sasanaŋ bâfuarâ Anuture micdâŋkoa juku wiac biŋe qaŋarekicne irec fârine ronšepieŋ.

37“Irec dameŋ bembeŋne mac moc fokac i tarame
wareocte mukicne e ŋeŋe râqâc mi ehuc biac fisiocmu.
38Ŋicnane biaŋkekicnezi ine mamanasiŋte erâ juju hotâckeocmu,
â docke pârâc eocmuo maŋnanezi manacnepe mi biaŋkeocmu.”
39Nâŋâc ine docke pârâc ehuc sisipiricko rara irec biŋe mâcne, nâŋâc manasiŋkehuc maŋ qâqâtâc ŋeŋezic irec biŋe.